石庫門弄堂里個“近親結婚”

2020-06-07 17:36

來源：澎湃新聞·澎湃號·湃客

原創(chuàng) 馬尚龍海上夢疊

作者：馬尚龍

滬語改寫、朗讀：洪瑛

文字修正、指導：丁迪蒙

老早，也就是四十年前頭伐，上海石庫門弄堂里有人結婚，酒水基本浪就擺勒石庫門弄堂里，自家屋里就是新郎新娘搭雙方父母加起來個一兩桌，其它個桌頭，就擺在弄堂里個隔壁鄰舍屋里了。

搭鄰居關系好勿好，勒辦酒水就看出來了。

勿是伊拉歡喜勒石庫門里辦婚禮，要扎自家臺型個上海味道，而是嘸沒地方辦婚禮，借不到天末，只好借地咾。

迭個辰光個上海還是老窮個，嘸沒改革開放，社會個主人就是窮人，上海灘嘸沒幾家飯店，普通老百姓也是嘸沒鈔票到飯店里去消費個。到了上世紀七十年代，一大批青年儕到了談婚論嫁個辰光，雖然上級領導部門提倡“移風易俗”，辦個革命化個婚禮，但對于老百姓來講，結婚嘛，總歸要有明媒正娶個儀式感。老百姓個結婚儀式感，就是車嫁妝、辦喜酒、發(fā)喜糖，一方是兒子討老婆，一方是囡兒嫁出去，儕是頂頂風光個事體。只不過伊個辰光，雙方儕勿富裕，飯店也嘸沒開放辦喜酒。

搿個辰光，石庫門弄堂辦喜酒個兩大優(yōu)勢就顯現(xiàn)出來了，第一，是石庫門鄰里之間個熱情，歡喜做熱心個事體，勿像公寓里個鄰居，有文化但矜持，彼此之間有距離感；第二，石庫門雖然一戶一戶分門進出，但是每家人家個一層樓儕是比鄰，儕可以派用場。

要是15號張家兒子要結婚了，只要算清爽有幾化人來吃喜酒，總歸會得有最熱心、也是最難搞得定個人毛遂自薦、運籌帷幄。隔壁老王個客堂間可以擺兩桌，對面張木匠屋里好擺一桌，圓臺面有幾只就擺幾只，勿夠就是方臺子配長凳，也好坐個八個人了。搿能一來，酒席真?zhèn)€是要從弄堂口擺到弄堂底了。葛么阿里有介許多個親親眷眷啦？弄堂里個隔壁鄰舍也要算進去個呀，人家出地方個出地方，借圓臺面?zhèn)€借圓臺面，單位食堂個師傅來掌勺了，阿里家人家可以勿請啊？

新郎新娘勿像現(xiàn)在搿能個高大上，儕比得上王子、公主個婚禮，也嘸沒婚慶司儀，更加嘸沒五點十八分二十八分開席個做法，人坐齊了就開始吃，圖個就是鬧猛呀。菜是家常菜，有魚有肉，有足夠個量就可以了，真?zhèn)€要是阿里只冷菜味道好，搶光了，主人家會得來添個，比方講鰻鲞搶光了，再加眼，水筍燒肉吃光了，也好再加點。當然咾，加上來個質量就要差眼了，鰻鲞是尾巴部位，水筍燒肉就是筍、多肉少了。除脫擺勒自家屋里個一兩桌，還有敬酒個儀式，弄堂喜酒是吃好算數(shù)個。鬧新房，搿是要到新房間里再去鬧個了。

石庫門喜酒最大個亮點是，新郎新娘“親近結婚”個概率邪氣高。

勿是血緣浪向個近，而是鄰里浪向個近。3號王家兒子搭18號二層閣劉家囡兒結婚，算近親結婚伐？石庫門儕是知根知底個，人好、人壞儕看勒眼睛里，相互之間親和隨便，甚至隔壁弄堂也是面熟陌生個。少男少女眉來眼去，要么就自家要好了，要么就是弄堂里個紅娘來介紹了，一條弄堂或者是隔壁弄堂個，經(jīng)濟條件儕差勿多，爺勒拉廠里做啥，拿多少工鈿，也勿是啥個秘密，屋里有幾個阿弟阿妹，將來結婚有得亭子間伐，或者后樓可以搭只閣樓伐，介紹個辰光，儕講得清清爽爽，要想吹牛也吹勿響。人看中了，爺娘也看中了，成功率就老高了。

特別是經(jīng)過一個熱天個乘風涼，夜里勒弄堂里向擺只躺椅，青年男女抬頭看星星，低頭談戀愛，總歸會得出幾對有苗頭個了。等到了開年，也就要辦喜酒了。

乘風涼乘出男女情，是石庫門弄堂個一道風景。順帶便講一句，有辰光，姘頭軋發(fā)軋發(fā)也就軋出來了。鄰居男女，隔壁頭個私情，用現(xiàn)在個標準來看，大多數(shù)是“勿正當男女關系”，其實是嘸沒啥事體個，就是比較講得攏啦。

近是實在近，12號個黃家阿六頭，討了28號個張家妹妹。老早，嫁妝就是勒弄堂里搬過去個，新娘子也是走過去個。后首來，條件好點了，嫁妝還是直接搬過去，但是新娘子過門，就有點小小排場了。新娘子勿朝婆家走，而是要走到弄堂口，已經(jīng)有得出租車停勒海了，新郎來接個。上了婚車，到鬧猛個地方去兜一圈，又回到弄堂口，新郎、新娘再走進弄堂，算是乘過婚車了。

改革開放前頭，上海石庫門個婚禮就是搿能個尷尬，可以講，撥石庫門，撥上海人搭仔內地老百姓，慢慢叫帶來好日腳個，只有，也唯有改革開放，之前個日腳么？哼哼！